Гэты помнік з'явіўся ў Полацку ў 2003 годзе, падчас святкавання ў горадзе Дня беларускага пісьменства. Сапраўднае імя асветніка - Самуіл Гаўрылавіч Пятроўскі-Сітняновіч. Полацкім яго празвалі па месцы нараджэння, бо менавіта ў старажытным беларускім горадзе ў 1629 годзе з'явіўся на свет будучы багаслоў, вучоны, паэт і драматург. Атрымаўшы добрую адукацыю, Сімяон Полацкі пастрыгся ў манахі. Ён часта чытаў пропаведзі, дзякуючы якім стаў вядомы далёка за межамі ВКЛ.

Рускі цар Аляксей Міхайлавіч запрасіў яго заняцца выхаваннем сваіх дзяцей; князёўна Соф'я пазней гаварыла пра Полацкага як пра свайго духоўнага настаўніка. Таксама Сімяон Полацкі праславіўся як літаратар, для многіх ён асацыюецца з сілабічнай паэзіяй. У Полацку не толькі ўсталяваны помнік асветніку, але дзейнічае таксама музей-бібліятэка імя Полацкага, дзе захоўваюцца ўнікальныя кнігі і рукапісы, створаныя асветнікам.